Ұлттық архивте Ұлттық баспасөз күніне орай «Шерхан Мұртазаның қаламгерлік қазынасы» тақырыбында дөңгелек үстел өтті. Іс-шараға ҚР Мәдениет және ақпарат министрлігінің өкілдері, мемлекет және қоғам қайраткерлері, ғалымдар, журналистер, архив мамандары мен жазушының замандастары қатысты. Жиында ҚР Премьер-министрінің орынбасары – Мәдениет және ақпарат министрі Аида Балаеваның құттықтау хаты оқылды.
«Шерхан Мұртаза қазақтың болмыс-бітімін көркем сөзбен кескіндеген қайраткер ретінде елдік мүддені бәрінен биік қойды. Журналистиканы ұлтқа қызмет етудің жолы деп білді. Қазақ баспасөзінде қалыптастырған мектебі, редактор ретіндегі талапшылдығы, еңбекқорлығы тұтас бір буынның кәсіби әрі азаматтық тұлға болып қалыптасуына ықпал етті. Еліміздің Ұлттық архивінде зиялы тұлғаның жеке құжаттарының ғылыми тұрғыда жүйеленіп, ұлт игілігіне айналуы – аса маңызды тарихи оқиға. Бұл ұлттық жадымыздың толыққанды қорғалуына жасалған нақты қадам деп білемін», – делінген құттықтау хатта.
Дөңгелек үстел аясында Шерхан Мұртазаның жеке қорынан Ұлттық архивке қабылданған сирек құжаттары мен қолжазбалары, қойын дәптерлері, фотосуреттері мен кітаптары ұсынылған көрме өтті. Сонымен қатар қаламгердің қазақ баспасөзі мен ұлттық журналистиканың дамуына қосқан айрықша үлесі мен азаматтық ұстанымы баяндалды.
