Қазақ даласында қасиетті саналып, халық жадында аңыз бен сенім арқылы сақталған орындар аз емес. Солардың бірі – Қазығұрт тауының етегінде орналасқан Қырық Шілтер әулие жері. Бұл орын туралы айтылатын аңыз елге иманның беріктігін,намаз-құлшылыққа адалдық пен рухани тазалықтың биік үлгісін паш етеді.
Ертеде Шілтер есімді әулие кісі өмір сүрген деседі. Ол бар ғұмырын Аллаға құлшылық етуге арнаған, ісі ақ, ниеті таза, сөзі түзу, жүрегі судай мөлдір жан болған екен. Қай жерде жүрсе де, қасында ниеттес, жолдас қырық кісі бірге болыпты.
Бір күні Шілтер серіктерімен бірге жолаушылап келе жатып, Қазығұрт тауының етегіне келіп тоқтайды. Жол азабынан тынығып, дәм татқан соң, бесін намазын оқуға ниет етеді. Қырық серігімен сап түзеп, жамағатпен намазға кіріскен сәтте, таудан түскен қарақшылар аяқ астынан шабуыл жасап, оларды қырып салмақ болады.
Алайда Шілтер мен оның серіктері намаздарын бұзбайды. Қару асынған дұшпандар қаптап келіп тұрса да, олар Алла алдындағы құлшылықты бәрінен биік қояды. Сол сәтте әулие жүрек түбінен Аллаға жалбарына тіл қатады:
«Иә, Құдайым, бізді жау қолына түсіре көрме, жау қолына түскенше тас мүсінге айналдырып қатыра гөр», – деп дұға етеді.
Қасиетті дұға қабыл болып, Шілтер мен оның қырық серігі намаз үстінде тасқа айналып, сол күйінде қатып қалады. Сөйтіп, олар тәнімен емес, рухымен мәңгілікке құлшылықта қалған деседі.
Осы оқиғадан кейін ел бұл қасиетті орынды «Қырық Шілтер әулиенің жері» деп атап кеткен. Халық сенімінде бұл аумақ ерекше рухани қуатқа ие мекен саналады.
Қырық Шілтер маңында біріне-бірі қарама-қарсы орналасқан үш бұлақ ағып жатыр. Әр бұлақтың дәмі де, шипасы да әртүрлі. Ел ішінде бір бұлақтың іш ауруларына, екіншісінің көз ауруларына, ал үшіншісінің құлақ ауруларына дауа болатыны айтылады.
Қырық Шілтер қорымы – қазақ халқының діни дүниетанымында иманға адалдықтың, құлшылықтағы беріктіктің және Аллаға деген шынайы тәуекелдің нышаны ретінде сақталып келген қасиетті мекен.
Абылайхан ҚАЛНАЗАРОВ
