Мемлекет басшысы Қызылордада өткен Ұлттық құрылтайдың V отырысында Мемлекеттік Тудың дұрыс қолданылуына қатысты мәселелердің арнайы нормалар және ережелер арқылы реттелетінін айтып, заң талаптарының маңызын атап өткен болатын.
Осыған орай, Көкшетау қаласында Қазақстан Республикасының Мемлекеттік Туы, Мемлекеттік Елтаңбасы және Мемлекеттік Әнұранын пайдалану тәртібін реттейтін заңнама талаптарын түсіндіруге бағытталған семинар ұйымдастырылды.
Іс-шараға Мәдениет және ақпарат, Сауда және интеграция министрліктерінің өкілдері, Геральдикалық зерттеу орталығының мамандары, Көкшетау қаласының мемлекеттік органдары, Ақмола облысы ішкі саясат басқармасы, аумақтық инспекциялар мен білім беру ұйымдарының өкілдері қатысты.
Семинар барысында қатысушыларға Конституция нормалары мен салалық нормативтік-құқықтық актілердің талаптары кеңінен түсіндіріліп, мемлекеттік мекемелерде рәміздерді орналастыру тәртібі нақтыланды. Сонымен қатар жиі кездесетін заңбұзушылықтар талданып, олардың алдын алу жолдары талқыланды.
