Сұрақ: Исламда аманатқа қиянат жасау туралы не айтылған?
Жауап: Қазіргі қоғамдағы үлкен мәселенің бірі – аманатқа қиянат жасау. Әдетте адамдар арасында мал-мүлік, ақша, зат, құпия сақтау, отбасы сыры сынды дүниелерге қиянат жасалып жатады. Бұл әрекет адамдар мен туыстар арасындағы қарым-қатынасты жояды. Нәтижесінде адамдардың бір-біріне деген сенімдері әлсірейді.
Қиянатшылдықты Құран аяттары мен пайғамбарымыздың (с.а.у.) хадистерінде қаралап, екіжүзділік қасиетке теңеген. «Анфал» сүресінің 27-аятында: «Уа, иман келтіргендер! Аллаға және пайғамбарға опасыздық жасамаңдар. Егер олай істесеңдер, араларыңдағы аманаттарыңа да біліп тұрып қиянат жасайтын боласыңдар» десе, пайғамбарымыздың (с.а.у.) хадисінде: «Екіжүзді адамның үш белгісі бар: сөйлегенде өтірік айтады, уәде берсе орындамайды, аманатқа қиянат жасайды» деген.
Демек, қиянат жасау адамдардың бойындағы жаман қасиеттің бірі екен. Мұндай жаман әдеттен арылып, жақсылыққа жарысу – Исламның құптаған амалдарынан.
Икрам АЙТАЕВ
