Сұрақ: Жасаған жақсылықты міндет қылу дұрыс па?
Жауап: Исламда Алланың ризашылығына бөленетін үлкен амалдардың бірі – жақсылық жасау. «Жақсылықтың қайтарымы – жақсылық» деп, ізгі істерге ұмтылатын азаматтар көп. Адам істеген жақсылығы үшін Алладан сауап үміт етеді.
Ал, оны міндетсіну дұрыс амалдардан емес. Міндетсінген игі-амалдардан сауап күтуге болмайды. Шынайы ниетпен істелген жақсылық – ешқашан есепсіз, қайтарым күтпейді. Демек, Ислам тағылымында жасаған көмегін айтып еске салмай, жақсылықтың қадірін кетірмей, саудаға айналдырмау керек. Жақсылықты міндет үшін емес, ниет үшін жасалса – қайырлы.
«Бақара» сүресінің 262-аятында: «Мал-пұлын Алла жолында сарп етіп, соңынан бергенін міндетсінбейтін және (өзінен жәрдем алушыны) ренжітпейтін кісілердің Раббыларының дәргейінде алатын мол сауабы бар» деген. Жақсылық істеп берекеге бөлене беріңіз.
Икрам АЙТАЕВ
