Сұрақ: Зина – қарыз ба?
Жауап: Зина дегеніміз – некесіз жыныстық қатынасқа түсу. Исламда Аллаға серік қосудан кейінгі ең ауыр күнәлардың бірі. Оның кесірі жеке адамға, отбасына, қоғамға әсер етеді. Зинаның саны артса, қоғамды іштей бұзып, арсыздық жайлайды.
Дәстүрлі дінде зинақорлықтың екі дүниедегі де зардаптары айтылған. Құран аяттарында, пайғамбарымыздың (с.а.у.) хадистерінде, исламтанушы ғалымдардың еңбектерінде кең баяндалған.
Имам Шафиғи сынды ғалымның өлең шұмақтарында «Зина – бұл қарыз. Кім оны алса, үй ішімен өтейді» деп, зинақорлықтың кесепаты отбасына тиеді деген көзқарасы айтылған.
«Нұр» сүресінің 19-аятында: «Иман келтіргендер арасында арсыздық атаулының етек алуын көксейтіндерге келсек, оларға бұл жалғанда да, ақыретте де жан төзгісіз ауыр азап бар» десе, «Исра» сүресінің 32-аятында: «Зинаға, тіпті жоламаңдар! Өйткені ол – барып тұрған азғындық, жаман жол!» деп, pинаға апаратын барлық жағымсыз іс-әрекеттен қайтарған.
Икрам АЙТАЕВ
