Өзбекстан астанасы Ташкентте «Орталық Азия: ортақ рухани-ағартушылық мұра – ортақ болашақ» атты халықаралық конгресс өтті. Қазақстан мұсылмандары діни басқармасының атынан Бас мүфти Наурызбай қажы Тағанұлының тапсырмасымен ҚМДБ Діни сараптама бөлімінің меңгерушісі, PhD докторы Нұрлан Қайырбеков қатысып, баяндама жасады.
Үш күнге созылған шараның алғашқы күнінде араб елдері мен Орталық Азия мемлекеттерінің ғалымдары пленарлық баяндамалар жасады. Конференцияның ашылу салтанатында Өзбекстан, Тәжікстан, Әзірбайжан мәдениет министрлері, сондай-ақ Қазақстанның зиялы қауым өкілдері сөз сөйледі.
Конгресс аясында өткен «Ислам өркениетінің рухани мұрасы және ислам құндылықтарын сақтау» секциясында Нұрлан Қайырбеков «Орталық Азия мұсылман дін ғалымдарының қолжазба көздері: тарих және қазіргі заман» тақырыбында ғылыми баяндама жасап, қазақ халқы мен Бас мүфтидің сәлемін жеткізді.
Сондай-ақ, аталған шараға ҚМДБ Сарапшылар кеңесінің мүшесі белгілі ғалым, профессор Досай Кенжетай қатысуда.
Соңғы күні қатысушылар ғылыми орталықтар мен кітапханаларды аралап, Өзбекстан Президенті Шавкат Мирзиеев пен Орталық Азия елдері президенттерінің қатысуымен өткен «Янги Ренессанс» халықаралық сыйлығын табыстау рәсіміне қатысты. Шара барысында аймақаралық ынтымақтастық туралы меморандумдарға қол қойылып, Орталық Азия декларациясы қабылданды.
