Сұрақ: Кешірімді болудың сауабы қандай?
Жауап: Кешірімді болуда үлкен хикмет бар. Ислам діні кешірімді, мейірімді, ақыл-парасатты болуға шақырады. Кешірім болған жерде жұмсақтық пен татулық орын алады. Кешірімді болу – жүрек тазалығының, иманның және даналықтың белгісі. Ол әлсіздік емес, сабырлылық пен рухани күштің белгісі. Кешірімділік – өзгеге жасалған жақсылық қана емес, өзіңе тыныштық сыйлау.
Ал, кейбір адамдар ашу мен ызаға бой алдырып, түрлі келеңсіз жағдайларға кез болады. Ең қайырлысы – мән-жағдайды дұрыс қабылдап, кешірімді болу.
«Шура» сүресінің 43-аятында: «Алайда кімде-кім сабыр етіп, өзіне орынсыз озбырлық көрсеткенді кешірсе, шүбәсіз, бұл табандылық пен күш-жігерді талап ететін, сауабы зор іс болмақ», десе, «Шура» сүресінің 40-аятында: «Жамандықтың қарымы – істелген жамандыққа барабар жамандық болмақ. Ал енді кімде-кім кеше білсе һәм (өшпенділікке бой алдырмай) мәмілеге келсе, ондай жанның сауабын Алланың Өзі береді» деген.
Демек, Алладан сауап үміт етіп, кешірімді болуда үлкен хикмет пен сауап бар екен.
Икрам АЙТАЕВ
