Бүгін елордада Бас мүфти Наурызбай қажы Тағанұлының төрағалығымен Қазақстан мұсылмандары діни басқармасы Орталық аппаратының кезекті жиналысы өтті.
Жиында Бас мүфти дін қызметкерлеріне жолдаған бағдарлық баяндамасына сәйкес «Ислам және отбасы құндылығы» жылы аясында төрт бағыт бойынша атқарылған жұмыстар мен ұйымдастырылған шаралардың есебін тыңдады.
Бас мүфти өз сөзінде жыл басынан бері жүзеге асқан маңызды жобаларға тоқталып, ІІ Халықаралық Құран жарысының жоғары деңгейде ұйымдастырылғанын ерекше атап өтті.
Сондай-ақ Наурызбай қажы Тағанұлы Діни басқарма қызметінің барлық бағыттарында жұмыстардың жүйелі түрде орындалып келе жатқанын атап өтіп, алдағы кезеңде де осы бағыттағы істердің қарқынын төмендетпеу қажеттігін айтты.
Жиын соңында кадрлық өзгерістер туралы хабарланды. «Мұнара» газеті ЖШС директоры Серікбол Хасан өзінің өтініші негізінде директорлық қызметінен босатылып, бас редакторлық міндетін жалғастыратын болды. ҚМДБ Төрағасының шешімімен Ағабек Сыдықов «Мұнара» газеті ЖШС директоры қызметіне тағайындалды.
