Алматы қаласында өткен «Отбасы және пайғамбар өнегесі» тақырыбындағы рухани мәуліт кешінде «Хазіреті Әбу Бәкір Сыддық», «Құран інжулері», «Ислам энциклопедиясы» (I–II том), «Таухид», «Пәтуалар жинағы» (I–V том), «Пайғамбар отбасындағы мінсіз мәміле» кітаптарының тұсаукесер рәсімі өтті.
Іс-шара барысында Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы құнды еңбектердің жарық көруінің мән-маңызына тоқталып, халықтың рухани сұранысына сай сапалы әдебиеттер ұсыну – ҚМДБ жұмысының басым бағыттарының бірі екенін атап өтті.
Айта кетейік, Бас мүфти бастамасымен 2020 жылы «Мүфтият» баспасы ашылып, осы уақытқа дейін мұсылман жұртшылығының діни танымын арттыруға арналған 84 еңбек жарық көрді.
Салтанатты тұсаукесер рәсіміне Бас мүфти Наурызбай қажы Тағанұлымен бірге белгілі жазушы, драматург Смағұл Абатұлы, мемлекет және қоғам қайраткері Нұрлан Оразалин, ҚМДБ Ақсақалдар кеңесінің мүшесі, қаламгер Марат Тоқашбаев арнайы шақырылып, жаңа кітаптардың тұсауын кесті.
