ҚМДБ «Зекет және қайырымдылық» қорының «Мамандықтар мектебі» әлеуметтік жобасы аясында Астана қаласына іргелес орналасқан Пригород елдімекеніндегі оқу орталығында қысқа мерзімді тегін тігін курсы ұйымдастырылды.
Аталған жоба аясында 3 ай бойы аналар мен қыз-келіншектерге кәсіби тігіншілік негіздері үйретіліп, практикалық машықтар меңгертілді. Қатысушылар тігін машинасымен жұмыс істеу, түрлі бұйымдар пішіп, тігуді, үлгі жасауды және тігін саласындағы маңызды дағдыларды игерді.Оқыту курсының басты мақсаты – отбасылық табыс көзіне айналатын пайдалы кәсіп үйрету арқылы әлеуметтік жағдайы төмен, көпбалалы және жалғызбасты аналарды қолдау, еңбек нарығына бейімдеу. Курс соңында қатысушыларға арнайы сертификаттар табысталды.
Сонымен қатар, аталмыш шара аясында курсқа қатысушы аналардың мектеп жасындағы балаларына мектепке қажетті сөмкелер мен оқу құралдары сыйға тартылды. Бұл – жаңа оқу жылы қарсаңында отбасы бюджетіне жасалған нақты көмек.
ҚМДБ «Зекет және қайырымдылық» қоры алдағы уақытта да ел ішінде осындай оқыту курстарын кеңейтіп, әлеуметтік әлсіз топтарға нақты қолдау көрсетуді жалғастыра бермек.
