Сенат Төрағасы, Әлемдік және дәстүрлі діндер көшбасшылары съезі Хатшылығының басшысы Мәулен Әшімбаев «Діндер диалогы: болашақ жолындағы синергия» тақырыбына арналған VIII Съезд аясында қатысушылармен екіжақты кездесулер өткізді.
Сенат Спикері мәртебелі меймандарға ілтипат білдіріп, Әлемдік және дәстүрлі діндер көшбасшылары съезінің миссиясы жаһандық сын-қатерлер жағдайында халықтар, мәдениеттер және діндер арасындағы қарым-қатынасты жолға қоюға табан тірейтінін айтты. Сондай-ақ ол Форум идеяларын жан-жақты қолдағаны және көзделген мақсаттарға қол жеткізуге елеулі үлес қосқаны үшін қатысушыларға ризашылық білдірді.
«Қазақстан Президенті Қасым-Жомарт Кемелұлы Тоқаев халықаралық қауіпсіздіктің берік жүйесін қалыптастыру мәселесіне әрдайым баса мән береді. Қазіргі таңда әлем геосаяси шиеленістермен, әлеуметтік-экономикалық, экологиялық және климаттық қиындықтармен, сондай-ақ, басқа да сын-қатерлермен бетпе-бет келіп отыр. Осы күрделі кезеңде рухани дипломатия бүгінгі проблемаларды шешудің тиімді жолдарын табатын маңызды тетігі бола алады. Сондықтан жаһандық сын қатерлерді еңсеру үшін дін көшбасшыларының жасампаз рөлі айрықша мәнге ие және осы жолда күш біріктірудің маңызы зор», – деді Съезд Хатшылығының басшысы.
Қасиетті Иерусалимнің және бүкіл Палестинаның, Арабияның, Сирияның аса қасиетті Патриархы III Феофилмен кездесуде Съезд Хатшылығы мен Иерусалим Патриархаты арасындағы іс-қимылды арттыру мәселесі сөз болды. Сондай-ақ бірлескен жобаларды, оның ішінде Әлемдік және дәстүрлі діндер көшбасшылары съезі аясында өткен Діни нысандарды қорғау жөніндегі арнайы сессияда айтылған ұсыныстарды іске асыру барысы талқыланды.
Ал, Бас Ашкенази раввині Кальман Бермен және Бас Сефард раввині Дэвид Йосефпенсұхбат кезінде Мәулен Әшімбаев Қазақстан олардың әлемде конфессияаралық және дінаралық диалогты дамытуға арналған Съезге белсенді қатысуын жоғары бағалайтынын айтты. Кездесуде Қазақстан мен Израиль арасындағы екіжақты ынтымақтастық мәселелері де қозғалды.
Сонымен қатар Мәулен Әшімбаев Ватиканның Қасиетті тағының Дінаралық диалог бойынша дикастерия префектісі Кардинал Джордж Джейкоб Кувакадпен кездесіп, Рим Папасы Францисктің 2022 жылғы тарихи сапарына және оның ислам мен христиан әлемін жақындастыруға қосқан үлесіне ерекше тоқталды. Сенат Төрағасы Қазақстан Понтифик ресми сапармен келген және бейбітшілік пен көпұлтты үйлесімділікке назар аударып, «адамдар бір-бірін тыңдайтын, бір-бірін құрметтейтін кездесулер мен диалог мекені» деп атаған санаулы елдердің бірі екеніне тоқталды.
Мәртебелі меймандар өз кезегінде Әлемдік және дәстүрлі діндер көшбасшылары съезі жаһандық ауқымда бүкіл әлем үшін аса өзекті дінаралық диалог идеяларын дәріптеу ісінде маңызды рөл атқаратынын айтты. Сондай-ақ олар айтарлықтай беделге ие рухани көшбасшылар толеранттылыққа, жақсылық пен әділеттілікке шақырып, геосаяси және басқа да қақтығыстарды бейбіт жолмен шешуге ықпал етуі керек деген пікірді қолдайтындарын жеткізді.
