Сұрақ: Исламда арсыздық туралы не айтылған?
Жауап: Арлылық – адам бойындағы асыл қасиеттердің бірі. Жақсы қасиеттер адамды жақсылыққа жетелейді. Арсыздыққа бой алдырған адам ұят, намыс, әдеп сияқты қасиетті ұғымдарды аяқа таптап, басқаларды сыйлаудан қалады.
Ислам дінінде арсыздық ауыр әрі күнәлі қасиет ретінде қарастырылады. Қазіргі таңда қоғамда орын алып жатқан көптеген жағымсыз қылықтар, арсыздықтар дұрыс тәрбиенің болмауы мен жүректе ұят сезімінің аздығынан. Ұятсыздық пен арсыздықтың саны артқан сайын қоғам рухани азғындыққа ұшырайды.
Арсыздық тек адамның өзіне ғана емес, қоғамға, отбасыға, тіпті дінге де зиян келтіреді. Сондай-ақ ар-ұятқа негізделген ұлттық құндылықтардың мәні жоғалады. Дәстүрлі Ислам әрбір адамды қарапайым болуға, ар-ұятты сақтауға, отбасын арсыздықтан қорғауға, жағымсыз әрекеттерден тыйылуға үндейді.
Пайғамбарымыздың (с.а.у.) хадисінде: «Әрбір діннің өзіне тән мінезі бар, исламның мінезі – ұят»десе, тағы бір хадисінде: «Ұят – иманнан, ал иман жәннатта болады. Бұзық сөз дөрекіліктен, ал дөрекілік тозақта болады» деген.
Ар мен ұятымызды сақтап, дәстүрлі құндылықтарымызға берік болайық.
Икрам АЙТАЕВ
