Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының бастамасымен бесінші рет ұйымдастырылған халықаралық «HALAL EXPO-2025» көрмесі Алматы қаласында өз мәресіне жетті.
Ауқымды шараға шетелдік және отандық 100-ге жуық кәсіпорын қатысып, екі күн ішінде 20 мыңнан астам келуші халал өнімдермен танысып, сауда жасады.
Көрме аясында тұтынушыларға 9 тонна сүт өнімдері, 5 тонна ет өнімдері, 4 тонна құс еті, 8 тоннадай кондитерлік өнімдер, 5 тоннаға жуық шұжық өнімдері, 3 тоннадан астам жартылай фабрикаттар, 4 тоннаға жуық сусындар (кофе, шай, сироптар), 2 тоннаға жуық емдік-профилактикалық өнімдер және 1 тоннадан астам фаст-фуд өнімдері ұсынылды.
Сонымен бірге, халықаралық әріптестік байланыстар нығайып, кәсіпорындар арасында келісімшарттарға қол қойылды. Арнайы марапаттау рәсімінде «Үздік халал кәсіпорын», «Үздік маман» номинациялары бойынша жеңімпаздар анықталды.
