Сұрақ: Азан айтуда сауап бар ма?
Жауап: «Азан» сөзінің хабар беру, құлақтандыру, білдіру деген мағыналары бар. Бес уақыт намаздың уақыты кіргенін білдіру үшін жасалатын амал.
Азанды ақыл-есі түзу, діннен хабары бар ер адам айтуға тиіс. Ол өзіне тән арабша мәтінімен созылып айтылады.
Бес уақыт намаз бен жұма намазына азан шақыру ерлер үшін – бекітілген сүннет. Азанның дауысы естілмейтін ауылдық жерлер болса ер азаматтар азан мен қаматын айтып үйінде намазын оқуына болады.
Бес уақыт намаздың кіруімен тұрақты азан айтушы мол сауапқа бөленеді. Азаншылықтың ерекшелігі жайлы хадистерде көптеп кездеседі. Пайғамбарымыз (с.а.у.) хадисінде: «Азаншы дауысының естілген жерінің көлеміне қарай күнәсі кешіріледі. Дауысы естілген жердегі барлық нәрсе оған куәлік етеді» десе, тағы бір хадисінде: «Адамдар азан шақыру мен намаздың алдыңғы сапында тұрудың не екенін (сауабын) білсе және бұған қол жеткізу үшін жеребе тартудан басқа шарасы болмаса, міндетті түрде жеребе тартар еді» деген.
Демек, азаншының жұмысы да сауапқа бөленетін амалдардан екен.
Икрам АЙТАЕВ
