Ардақты Мұхаммед пайғамбарымыз (с.ғ.с) өзінен бұрынғы пайғамбарлармен өзінің арасындағы байланысы туралы былай деп баяндайды.
– «Менімен менен бұрынғы пайғамбарлардың мысалы – үй тұрғызған бір кісі секілді. Әдемі, көркем етіп салады, тек бір бұрышында бір кірпіштің орыны бос қалады. Халық ол үйді айналып көріп ұнатып: «Әттең мына бір кірпіші қойылса ғой» дейді. Сол кірпіш «Мен боламын», -деген екен.
Көріп отырғанымыздай пайғамбарымыз «Үйді бұзып қайта тұрғызушымын деген жоқ, толықтырушымын, аяқтаушымын» – деген.
Яғни, ислам діні жақсылық жолды қиратушы емес, керісінше толықтырушы екендігін көрсетеді.
Біздің бұдан алар үлгіміз: Егер Құран мен сүннет жолын өмірімізге енгіземіз десек, Құран мен сүннетке қызмет жасаған ғұлама бабаларымыздың мұрагері, Құран мен сүннет арқылы өмірін өрнектеген дана халықтың ұрпағы ретінде солардан қалған сара жол, даңғыл дәстүрді жаңғырта отырып кемелдендіруіміз керек.
Әйтпесе, дәстүрді мансұқтап, ғасырлар бойы ұстанған халқымыздың сара жолын тәрк етіп, дайын тұрған үйді бұзып далада қалумен тең.
Дайындаған – Тұрар ТҮГЕЛҰЛЫ
