Сұрақ: Астанада өтіп жатқан діндер съезінің мақсаты не?
Жауап: Әлемде екі жүзге жуық мемлекет бар. Әр елдің қалыптасқан дәстүрлі діні бар. Елде дінараздық алауыздық орын алса, тұрақсыздық пайда болады. Оның соңы бүлікке ұласуы мүмкін.
Осыған орай, әлемде діни тұрақтылық пен діндер арасында татулықты сақтау – басты мақсат. Алғаш рет 2003 жылы қыркүйек айында Әлемдік және дәстүрлі діндер көшбасшыларының съезі еліміздің астанасында өткен. Сол кезден бастау алған съезд әр 3 жыл сайын ұйымдастырылып, кезекті ҮІІІ сфорум елордамызда өтіп жатыр. Іс-шараға алпысқа жуық елден, жүзден астам делегация келді.
Бұл форумның басты мақсатының бір – әлемдегі әртүрлі дін өкілдері арасында бейбітшілік, өзара түсіністік және дінаралық келісімді нығайту. Сондай-ақ, съезде тұрақтылық пен бейбітшілікке бағытталған бірнеше маңызды шешім мен үндеулер қабылданды. Діни төзімділік пен өзара құрметті нығайту, экстремизм мен терроризмге қарсы бірлескен күрес, адам құқығы мен ар-намыс, климат пен табиғатты сақтау сынды мәселелер қамтылады. Іс-шара тек діни көшбасшылардың ғана емес, бүкіл халықаралық қоғамдастықтың назарын өзекті мәселелерге аударып, адамзат бірлігі мен бейбітшілікті нығайтуға бағытталды.
Икрам АЙТАЕВ
