Мына әлемде ана мейіріміне жетер ештеңе жоқ. Ана мейірімі әлемді өз нұрымен безендіріп тұрады. Анасыз мына тіршілікті көз алдыңа елестетіп көрсең, одан өткен қиыншылық жоқ шығар дерсің.
Алла Тағала Құран Кәрімде: «Адам баласына әке-шешесіне жақсылық істеуді нұсқадық. Өйткені шешесі оны зорға көтеріп, әрең босанады…», – деп баяндайды. (Ахқаф сүресі, 15 аят). Алланың құзырында ананың қадірі өте жоғары екендігі көрсетілген.
Бірде Төле би бабамыз жаудан қалған бір жасар баланы тауып алып, оны бір келініне әкеліп, былай депті;
– «Бір жылдан кейін тексеремін, өз балаңа қалай қарасаң, бұл балаға да солай қара» деген екен.
Бабамыз бір жылдан кейін келіп қараса, келіннің өз баласы топ-томпақ, ал атамыздың қалдырған баласы ап-арық, жүдеу көрінген екен. Сонда қатты қысылғаннан, ұялғаннан келіні:
– «Ата, екі баланы бірдей еміздім. Сүтімді тең бөліп бердім. Бірақ неге олай болғанын түсінбей отырмын» дейді. Сонда Төле би атамыз:
– «Балаға ең алдымен сүт емес, ананың мейірімі керек. Сен мейіріміңді өз балаңа төккенсің, ал бұл балаға сондай мейіріммен қарамағансың» – деген екен.
Дайындаған – Тұрар ТҮГЕЛҰЛЫ
