«Нұр Мүбарак» университетінде оқып жүрген кезімізде мысырлық Сами Хижази деген ұстаз сабақ беріп еді. Тасауыф бойынша маман, профессор болатын. Кейін науқастанған соң Мысырға қайтып, сол жерде өмірден озды.
Сол кезде біздің университеттің жаңа тағайындалған ректоры Жуда Абдулғани Басюни мырза Мысырға барғанда, марқұм Сами Хижазидың балалары кітаптарын Мысырдағы Уақыптар министрлігіне тапсырғанын естиді. Ректор Басюни мырза сол кітаптарды «Нұр Мүбарак» университетіне аламыз деп Уақыптар министрлігіне өтініш хат жазады.
Содан соң «Нұр Мүбарак» университетінің Қазақстан жағынан басшысы, проректор, профессор Шамшәдин Керімге хабарласып, жолдағы жүк үшін төленетін қаражатты университет есебінен беруді сұрайды. Осылайша, Сами ұстаздың уақып еткен кітаптары еліміздегі «Нұр Мүбарак» университетіне жеткізіледі.
Дінімізде «уақып» деп белгілі бір мал-мүлікті көп мәрте қайырымдылық жолында пайдалануды айтады. Яғни уақып дегеніміз – үзілмейтін садақа.
Алла ұстазымызға разы болып, уақыбын сауапқа жазып, иманын жолдас етсін!
Қуат ҚАБДОЛДА
