Сұрақ: Қандай рухани кеселдерден арылған дұрыс?
Жауап: Адам бойына жақсы қасиеттер отбасында дариды. Ал рухани кеселдер – адамның ішкі жан дүниесін былғап, рухани дамуына, ізгілік пен адамгершілікке жету жолында кедергі болады. Жаман қасиеттер отбасына, қоғамға кері әсерін тигізеді. Адам өзін, отбасын тәрбиелеуден кемшілік жіберсе, түбінде зардабын көреді. Рухани әлсіреген адам жат ағымдарға, жағымсыз қасиеттерге бейім болады.
Арылуымыз тиіс негізгі кеселдер: менмендік пен өзімшілдік, сараңдық пен дүниеқоңыздық, кекшілдік пен кешірімсіздік, өсек пен жалаға бейім болу, нәпсіге ерік беру, қызғаныш пен көреалмаушылық, мақтаншақтық пен риякершілік, екіжүзділік пен пасықтық т.б. Мұндай жаман қасиеттер адамды рухани азғындатып, ұятқа қалдырады.
Әр азамат өз жүрегін «тазартып», жақсы қасиеттерге ұмтылған сайын жетістікке жетері хақ. Жақсы қасиеттердің иесі болып, ақылдылық пен парасаттылыққа жеткеніміз қайырлы болмақ. Пайғамбармыз (с.а.у.) хадисінде: «Алла Тағала жұмсақ. Әрі жұмсақтықты жақсы көреді. Ол қатыгез кісіге нәсіп етпеген нәрсесін, оған (мейірімдіге) нәсіп етеді» деген.
Икрам АЙТАЕВ
