Сұрақ: Әлеуметтік желіден діни мәліметтер алуға бола ма?
Жауап: Ғаламтор – дүниенің әр түкпіріндегі тұтынушылардың бір-бірімен мәліметтер алмасуына тиімді құрал. Бірақ ол жерде адамға пайдасымен қоса, зиянын тигізетін ақпараттар да жетерлік. Соның бірі – діннің атын жамылған деструктивті діни ағымдардың идеологиясын құрайтын ақпарат көздері. Олар әсіресе әлеуметтік желілерді торуылдайды.
Ғаламтор желісінде таратылатын радикалды бағыттағы діни идеологиялардың көздейтіні – халыққа белгілі бір діни сенімдерді ұялату және өз ұйымдарына мүмкіндігінше көп пікірлес адамдарды тарту. Әсіресе, жастарға ықпал ету мақсатында ғаламтор желілерінде бейнероликтер, діни әдебиеттер арқылы экстремистік және террористік идеяларды насихаттап, соны ақиқат жол деп насихаттайды.
Радикалды экстремистік идеологиялардың ықпалындағы діни ағым өкілдері қоғам мен мемлекетке қарсы зорлық-зомбылық актілерін ұйымдастыру мен радикалды іс-әрекеттерді жүзеге асыруға бейім болатыны белгілі.
Сондықтан әлеуметтік желіден діни мәлімет аларда оның қандай парақша немесе кімнің жеке аккаунты екеніне назар аудару қажет. Дін туралы жазылған дүниелерді тек сенімді көздерден оқыған абзал. Ал діни білімді тек ресми оқу орындарында ұстаз алдында отырып алу керек.
Икрам АЙТАЕВ
