Сеулдегі Кёнхи университетінің Медициналық колледжінің ғалымдары 1990 жылдан 2021 жылға дейінгі аралықта 102 елдегі суицид деңгейін зерттей келе осындай қорытындыға келді, деп жазды DW.
Nature Mental Health журналында жарияланған зерттеу нәтижелеріне сәйкес, табысы жоғары елдерде бұл төмендеу одан да айқын байқалады.
Зерттеу деректері бойынша, 102 елде суицид деңгейі орта есеппен 29,9%-ға азайған: 1990 жылы әр 100 мың адамға шаққанда 10,33 жағдай болса, 2021 жылы бұл көрсеткіш 7,24-ке түскен. Ғалымдар бұл өзгерісті Еуропада жастардың психологиялық жағдайына көбірек көңіл бөліне бастағанымен және БАҚ-та суицид тақырыбына абайлап қарауымен байланыстырады.
Табысы жоғары 54 елде жағдай тіпті жақсырақ: 1990 жылы 100 мың адамға шаққанда 12,68 жағдай тіркелсе, 2021 жылы (COVID-19 пандемиясы кезінде) бұл көрсеткіш 8,61-ге дейін төмендеген, яғни 32,1%-ға қысқарған. Ал табысы төмен және орташа елдерде бұл көрсеткіш 7,88-ден 5,73-ке дейін азайған. Алайда зерттеушілер ескертеді: кейбір елдерде барлық жағдайлар тіркелмеуі мүмкін, сондықтан бұл сандарға сақтықпен қарау қажет, әсіресе кедей елдерге қатысты статистика бұрмалануы мүмкін.
Зерттеу тобының болжамынша, 2050 жылға қарай суицид деңгейі баяу болса да төмендеп, әр 100 мың адамға шаққанда 6,49 жағдайға жетуі ықтимал.
Фрайбург университетінің Медициналық психология және медициналық әлеуметтану институтының өкілі Лассе Зандер бұл тенденциялар басқа зерттеулердің нәтижелерімен сәйкес келетінін айтты. Алайда ол былай деп ескертті: ұзақмерзімді оң өзгерістер байқалса да, «көрсеткіштер әлі де тым жоғары» екенін ұмытпауымыз керек.
Оның айтуынша, жыл сайын әлемде 700 мыңнан астам адам өз-өзіне қол жұмсап көз жұмады.
— Тек Германияның өзінде 2023 жылы 10 мыңнан астам адам суицидтен қайтыс болды — бұл жол-көлік апаттары, СПИД, есірткі және зорлық-зомбылық қылмыстарының қосындысынан да көп, — дейді маман Германияның Ұлттық суицидтің алдын алу бағдарламасының деректеріне сүйене отырып.
https://kaz.inform.kz/news/alemde-suitsid-sani-ush-esege-kiskardi-f24725/
