Сұрақ: Жұма намазында сыртта аяқ киіммен намаз оқуға бола ма?
Жауап: Қазіргі таңда елімізде үш мыңға жуық мешіт бар. Бұл жақсылықтың нышаны. Мешітте бес уақыт, жұма, айт намаздары жамағатпен оқылады. Сол кезде мешіттің іші толып, адамдар сыймай, сыртта намаз оқуға мәжбүр. Сырттағы адамдарға намаз оқу үшін кілемдер жайылып, жағдайлар жасалады.
Егер ауа райының қолайсыздығына байланысты сыртта қалған адам аяқ киімінде нәжіс болмаса, тазалығына көзі жетсе, намаз оқуына болады. Пайғамбарымыз (с.а.у) хадисінде: «Егер сіздердің біріңіз аяқ киіммен лас нәрсе басып кетсеңіз, топыраққа ысқылаңыз. Өйткені топырақ ластықты тазалаушы» деген.
Тазалық – дініміздің ең басты қағидаларының бірі екенін ұмытпағанымыз жөн. Лас аяқ киіммен намаз оқу мәкруһ. Нәжіс болса, намаз бұзылу қаупі бар. Мүмкіндік болса, аяқ киімсіз таза жерде оқу қайырлы.
Икрам АЙТАЕВ
