Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының бастамасымен құрылған Түркі мемлекеттерінің Бас мүфтилер алқасы өз жұмысын жүйелі түрде жалғастыруда. Аталмыш алқа жанынан құрылған Пәтуа кеңесінің кезекті мәжілісі Түркия Республикасы Ғұламалар кеңесінің ұйымдастыруымен Анкара қаласында өтуде.
Бес күнге жоспарланған маңызды жиынға ҚМДБ Уағыз-насихат бөлімінің меңгерушісі, Ғұламалар кеңесінің хатшысы Батыржан Мансұров пен ҚМДБ Пәтуа бөлімінің маманы, Түркі мемлекеттері Пәтуа кеңесінің мүшесі Медет Құрмашұлы Құрсақов қатысуда.
Мәжілісте мұсылман үмбеті үшін бірқатар пәтуа мәселелері қаралуда. Атап айтқанда, «Намаз уақыттары мен айды көруге қатысты зерттеулер», «Сапар намазының арақашықтығы», «Желатин үкімі», «Зекеттің нисабы», «Құбылаға қатысты мәселелер» және өзге де тақырыптар күн тәртібіне енгізілген.
Айта кетейік, Пәтуа кеңесі – Түркі елдерінің діни мамандары мен ғұламаларының басын қосатын, ортақ діни мәселелер бойынша бірізді ұстаным қалыптастыруды мақсат еткен маңызды алаң. Кеңесте қабылданған шешімдер бауырлас мемлекеттердің бірқатар пәтуа бірлігін нығайтуға, шариғат талаптарын заман талабына сай негізде түсіндіруге сеп болмақ.
