Қазіргі таңда деструктивті діни ағымдардың ықпалы – қоғам үшін ең өзекті мәселенің бірі. Олар өздерінің жымысқы идеологиясын тарату үшін түрлі айла-шарғыны қолданады. Басты мақсаттары – халықты өз тамырынан, тарихынан, ата-баба дәстүрінен ажырату. Осылайша, рухани іргесі сөгіле бастаған адамды өздеріне оңай бағындырады.
Бұл ағымдардың ең қауіпті тәсілдерінің бірі – дәстүрлі дін өкілдеріне қарсы шығу. Өйткені исламның төл ілімін жетік меңгерген, ақ-қараны ажырата білетін имамдар мен ұстаздар ғана олардың жалған уағызын әшкерелей алады. Сол себепті радикалдар өз жақтастарын имамдардың сөзіне құлақ аспауға шақырады, оларды «бидғатшы», «сүннет жолымен жүрмейді» деп айыптайды. Осылайша, жастарды мешіттен алыстатып, жалған пәтуаға жетелейді.
Тағы бір алаңдатарлық жайт – бұл ағымдардың халқымыздың ғасырлар бойы қалыптасқан салт-дәстүрін жоққа шығаруы. Құдайы ас беру, Құран оқу, ата-бабаны құрметтеу, жеті атаны білу, бата беру, наурыз мерекесін тойлау – мұның бәрі халқымыздың дінімен біте-қайнасқан құндылықтары. Ал радикалды топтар мұның барлығын «дінге жат» деп, халықты өз тарихынан, мәдениетінен қол үздіруге тырысады.
Дәстүрінен, өткенінен, рухани іргесінен ажыраған адам – олардың идеологиясы үшін ең жеңіл олжа. Өйткені тамырынан айырылған жан айтқанға сенгіш, айдағанға көнгіш келеді. Мұндай адамның бойында сындарлы ойлау қабілеті әлсіреп, өзіндік ұстанымы жоғалады.
Деструктивті ағымдардың бұл қулығы тек жеке тұлғаға емес, бүкіл қоғамға зиян тигізеді. Олар адамдар арасындағы алауыздықты өршітіп, ұлттың бірлігіне сызат түсіреді. Қасиетті дініміздің атын жамылып, халықты адастыру – тек рухани емес, саяси тұрғыдан да қауіпті құбылыс.
Осындай адасулардың алдын алу үшін не істеу керек? Ең әуелі – қоғамда сыни ойлау қабілетін дамыту маңызды. Діни сауаттылықты арттыру, сенімді дереккөздерді ғана пайдалану, дәстүрлі ислам құндылықтарын дәріптеу – бұл бағыттағы ең басты қадамдар.
Бірліктің бастауы – рухани тұтастық. Ал шындықтың шырағын сөндірмей, әділдік пен парасат нұрын жүректерге себу – баршамыздың ортақ борышымыз.
Жасұлан БАҚЫТБЕК
