2001 жылы «Нұр Мүбарак» университеті екі мемлекеттің келісімі бойынша ресми түрде ашылып, оның ең алғашқы шәкірттері болу бақыты бізге нәсіп болды.
Мысыр елі тарапынан университет ректоры марқұм, профессор Махмұд Фахми Хижази болса, еліміз тарапынан доктор Шамшәдин Керім ағамыз сайланды. Университетке сол кезде қырықтан аса шәкірт қабылданды.
Бұрын «Таиба» колледжін бітірген бірнеше шәкірт қысқартылған топ болып оқып шықты.Негізінен бастан аяқ, төрт жыл оқып, ең алғаш ресми диплом алып шыққан шәкірттер біз болдық.
Аллаға шүкір, өте білімді, ықыласты ұстаздардан дәріс алу нәсіп болды.
Университетте араб ұстаздардан доктор Али Али Шағбан, доктор Ато ас-Сынбати, доктор Сами Хижази, доктор Мұхаммед Махфуз, доктор Рида Дақиқи, доктор Жалел, доктор Амир, доктор Фуад, Хамди Махрус, т.б сынды ұстаздар дәріс берді.
Ал қазақ ұстаздардан Мухиддин Исаұлы, Қайрат Жолдыбайұлы, Мадияр Меңлібеков, Алау Әділбаев, Рашид ұстаз, Гүлбахрам апай т.б сынды ұстаздар дәріс берді.
Сол кезде университетте Мысыр тарапы салған мешіт пен екі қабатты оқу корпусы ғана бар еді. ТМД елдері ішіндегі ең алғашқы екі мемлекет тарапынан ашылған жоғарғы оқу орны болды.
Емтихан тапсырып, исламтану мамандығын алып шығып, ел мешіттеріне қызметке аттандық.
Университеттің ең алғашқы қарлығаштары болған осы шәкірттер қазірде облыс өкіл имамдары, мешіт имамдары, университет, медресе ұстаздары, кәсіпкерлер болып ел игілігіне , дін жолында қызмет атқаруда.
Осының бәрі ұстаздарымыздың жемісі.
Алла олардың баршасына риза болсын!
Қуат ҚАБДОЛДА
