Алматы қаласындағы Нұр-Мүбарак Египет ислам мәдениеті университетінде тәрбиелік мәні зор шара ұйымдастырылды. Қазақстан мұсылмандары діни басқармасының төрағасы, Бас мүфти Наурызбай қажы Тағанұлы университеттің бітіруші түлектерімен бірге ағаш отырғызу рәсіміне қатысты.
Аталған шара бітіруші түлектерге диплом тапсыру рәсімі аясында өтті. Іс-шараның мақсаты – жас түлектердің бойында табиғатты аялау, қоршаған ортаға жанашырлықпен қарау секілді асыл құндылықтарды қалыптастыру, сондай-ақ ел болашағы үшін жасалып жатқан игі істерге үлес қосуға бағытталған.
Бас мүфти Наурызбай қажы Тағанұлы өз сөзінде түлектерді айтулы сәтпен құттықтап, білім мен тәрбие қатар жүретін ислам ілімінің маңыздылығына тоқталды. Сондай-ақ, ағаш отырғызу – адамзатқа сауапты іс екенін жеткізді.
Шара соңында университет аумағына бірнеше жеміс ағашы отырғызылып, түлектер естелік суретке түсті.
