Сұрақ: Зұлхижжа айының алғашқы күндері мен арапа күні қандай амалдар істеген дұрыс?
Жауап: Ислам күнтізбесі он екі айдан тұрады. Соңғы он екінші айы Зұлхижжа. Бұл айдың да, басқа айлар сияқты өзіндік ерекшеліктері бар. Оның алғашқы тоғыз күнінде істелген игі амалдар үлкен сауапқа бөленуге себеп болады. Сондықтан осы күндері көбірек ізгі іс істеу, нәпіл оразаларын ұстау, ғибадат ету, садақалар беру қайырлы іс екен.
Бұл жайлы хадистерде игі істердің сауабы еселеніп берілетіні айтылған. Сондай-ақ, тоғызыншы күнгі арапа күнінің де өзіндік орны бар.
Арапа күні ораза ұстау – сүннет. Бұл күні дәстүр бойынша Құрбан айтқа дайындық шаралары жасалады. Пайғамбарымыз (с.а.у.): хадисінде «Алладан үміт етемін, арапа күнінің оразасы – одан бұрынғы және одан кейінгі күннің кәффараты», – деген, тағы бір хадисінде: «Алла үшін Оған Зұлхижжаның он күнінде ғибадат еткендей сүйікті күн жоқ. Олардың бір күндік оразасы бір жылдық оразаға тең. Олардың бір түнін ұйқысыз өткізу, Қадір түнін ұйқысыз өткізгенмен тең» деп, бұл күндері ғибадат пен жақсы амалдармен өткізудің сауабы мол екендігін меңзеп отыр.
Зұлхижжа айының оныншы күні Құрбан айт күні, ораза ұстауға болмайтынын ескерген жөн.
Икрам АЙТАЕВ
