Сұрақ: Балаға Иса, Мұса пайғамбарлардың атын қою дұрыс па?
Жауап: Әр ұлттың өзіне тән ат қою ерекшеліктері бар. Ат қою көбіне халықтың сенімімен, ырым-жоралғыларымен байланысты болады. Мұсылман елдерінде пайғамбарлардың аты, тарихи және діни мағынаға ие басқа да, қасиетті аттар көп кездеседі. Қазақ дәстүрінде ержүрек батырлардың есімдерін берсе, кейде болашақта елге елеулі азамат атансын, өскенде дана, ғалым болсын деп ғалымдардың аттарын қояды. Сондықтан қай халық болмасын мағыналы, жақсы есімдерді таңдап отырған.
Ал балаға қойылған мағынасыз, жағымсыз есімінің жаман жағынан әсер ететіндігі белгілі. Жақсы есімдердің қасиеттерін дұрыс пайымдап, балаға мағынасы жақсы есім берісе, болашақ өмірі де жарқын болатынына сенген.
Иса, Исмаил, Мұса, т.б. пайғамбарлардың атын қою шариғатқа қайшы емес. Балаға діни тұрғыдағы мағыналы аттарды қойып, тәрбиесіне мән бермей, өскенде атына заты сай болмай, жағымсыз қасиеттердің иесі болса өкінішті. Баланың болашағына үміттеніп, дұрыс тәрбиеге мән беріп «Атыңа заты сай екен» деген сөзге лайықты болуына себепші болғанымыз абзал.
Пайғамбарымыз (с.а.у.) хадисінде: «Балаға жақсы есім қою – перзенттің әкесіндегі ақыларынан»деген.
Икрам АЙТАЕВ
