Сұрақ: Истихара намазын не үшін оқиды?
Жауап:«Истихара» сөзі бір істің ең қолайлысын, қайырлысын таңдау деген мағына береді.
Истихара – шынайы ниетпен Алладан бір нәрсенің жақсысын, игілігін, бағыт-бағдарын көрсетуін сұрап оқитын екі ракағат нәпіл намаз. Бұл намаз түрін күндіз немесе кешке намаздан кейін жатардың алдында екі рәкағат нәпіл намазынан кейін истихара дұғасымен орындалады. Дұғасында өзі ниеттенген амалдарының қайырын сұрап қазақша дұға жасауына болады. Бұл нәпіл намазды өзі үшін қайырлы немесе қайырлы еместігін ажырату үшін оқиды.
Мысалы үйлену, жұмыс ауыстыру, сапарға шығу, бір нәрсені сатып алу, т.б. игі жұмыстарға кіріспес бұрын орындайды. Осыдан кейін мәселе айқындалмаса, намаз бен дұғаны жеті күн қайталауына болады. Сосын ниеттенген ісіне көңілі толып орнықса, таңдаған амалын жақсы үмітпен бастайды. Ал көңілі тартпаса, ол істі істеу-істемеу өз еншісінде болады.
ҚМДБ-ның ресми дереккөздерінде истихара дұғасының арабша және қазақша мәтіндері қамтылған.
Икрам АЙТАЕВ
