Сұрақ: Исламда «жан» туралы не айтылған?
Жауап: «Жан» сөзінің мағынасы рух, нәпсі, күш деген ұғымдарды білдіреді. Рух, жан сөздерінің қолданыстағы ұғымы бір. Құран аяттарында жанның жаратылысы жайлы ақпараттар аз, ол Алланың құпия іліміне жатады.
Исламда рухтың бар екендігі және оның Алланың әмірінде болатыны, өлгеннен соң басқа бір әлемге баратыны айтылған. Діни түсінікте жан Алланың тарапынан берілген рухани болмыс, адам өлгенде тәні жерге, жаны Аллаға қайтады, ақырет күні әр адамның жаны тәніне қайтып қосылады деген. Сондай-ақ діни ақпараттарда ананың құрсағындағы балаға рух берілуі, өлім келгенде рух денеден бөлінуі, ұйқыдағы рухтың жағдайлары баяндалған.
Халық жадында тәннен бөлек, мәңгі өмір сүретін рухани болмыс және адамның ар-ожданы, рухы ретінде қарастырады.
Исламтанушы ғалымдар рух, жан ғажайып жаратылыс және оның қандай екені жалғыз Аллаға ғана белгілі екендігін атап өткен. «Исра» сүресінің 85-аятында: «(Уа Мұхаммед!) Олар сенен рух жайлы сұрайды. (Сен оларға): «Рух Раббымның ғана білетін ісі. Бұл мәселеде сендерге тым аз ілім берілген», деп айт» деген.
Икрам АЙТАЕВ
