Бүгін Астанада «Ардагерлер ұйымы» республикалық қоғамдық бірлестігінің ІІІ пленумы өткен болатын. Жиын барысында ұйым төрағасы, депутат Бақтықожа Ізмұхамбетов наурыз айында Бурабайда өткен Ұлттық құрылтайда Мемлекет басшысы алдында діни ахуалға қатысты мәселе көтергенін айтты.
«Президентіміз Қасым-Жомарт Кемелұлы, менің және әріптестерім көтерген қоғамды алаңдатқан әдеп, әдет-ғұрып, діни ахуалға қатысты мәселелерге алаңдаушылық білдіріп, ұлтымыздың болмысына жат идеологиялық теріс ағымдарға тосқауыл қойып, жүгенсіздікке жол бермеуді тапсырды. Осы орайда ардагерлерді алаңдататын мәселелерге тоқталсам.
Алдымен, әдет-ғұрып – бұл біздің ұлттық құндылығымыз, ұлттық идеялогиядағы ерекше орны бар ұғым. Ғасырлар бойы іріктеліп, сыналып, қалыптасқан әдет-ғұрыптарымызды дәріптесек, жеке пайда үшін, тіпті теріс пиғылда пайдаланатын әдет-ғұрыптарға тосқауыл қоюды қолға алуымыз керек.
Тілі мен дінін сыйлау әр халықтың міндеті. Бізде мемлекеттік тілге құрмет артып келе жатса, дінге көзқарас біраз бұрмалаушылыққа ұшырап, ұлтқа жат әдет-ғұрып көбейіп кетті» деді ол.
Оның айтуынша, жап-жас келіншектер, тіпті қыздар түр-түсі жақсы емес шұбалаңдаған көйлек, сырт киім киіп, бастарын көзге жағымсыз күлгін орамалдармен тұншықтыра орап, тіпті қара жамылып, бетін жауып жүргендер көп-ақ.
«Мен араб елдерінің бірінде бірнеше жыл қызмет істеген, мұсылманша жоғары білім алып, мешіт ұстап, бір кездері қуғында жүрген адамның немересімін. Дінге құрметпен қараймын. Дінді бет жауып, қара жамылып, үйлеспейтін сақал қойып, шалбар қысқартып емес, жүрегінде, халқымыздың қалыптасқан әдет-ғұрпымен ұстағаны дұрыс. Дінді сыйлау үшін бұрмаламай, теріс пиғылдан мүлдем аулақ болу керек. Мұны түсіндіру алдымен қоғамдық ұйымдардан басталып, мемлекеттік органдар тиісті қызмет істемесе, қолайсыз, тіпті қауіпті жағдайға ұшырауымыз да мүмкін» деді ол.
