Сұрақ: Ар-ұяттың діндегі орны қандай?
Жауап: Қазіргі таңда қоғамдағы теріс қылықтар мен жағымсыз әрекеттердің жасалуына ар-ұяттың аздығы себеп болып отыр. Арсыздық пен ұятсыздық жайласа, адамдар арасында мейірім жоғалып, қатыкездікке бой алдырып, қоғам бұзылады. Қоғамның бұзылуы, елдің рухани тұрақтылығына кері әсер етеді.
Ар-ұятты болу – ең асыл қасиеттің бірі. Әрбір ата-ана перзенттерінің бойына ұят, иба, намыс, қанағат, әдеп, шүкіршілік сынды игі қасиеттерді сіңдіре білгені дұрыс. Арлылық адамды жағымсыз істерден қайтарып, жақсылыққа итермелеп, жамандықтан сақтайды.
Егер, баланың бойына жақсы қасиеттерді сіңіре білмесе, ар-ұяттан мақұрым болып, санасын арсыздық билейді. Ондай адамнан түрлі жағдайларды күтуге болады. Түбінде дұрыс жауапкершілікпен қарамаған ата-ана абыройдан айырылып, опық жейді.
Пайғамбармыздың (с.а.у.) хадистерінде: «Ұят пен иман тығыз байланыста. Ергер ұят кетсе, екіншісі де бірге кетеді», «Әрбір діннің өзіне тән мінезі бар, исламның мінезі – ұят» деген.
«Мал сақтама, ар сақта» дегендей, адалдық пен арлылыққа мән беріп, Алладан жақсылықтарды үміт етейік.
Икрам АЙТАЕВ
