Алматыда Қазақстан мұсылмандары діни басқармасының ұйымдастыруымен өткен ауызашар дастарқанында «MUFTIYAT» баспасынан шыққан қос еңбектің тұсаукесер рәсімі өтті.
Игі басқосуда Бас мүфти Наурызбай қажы Тағанұлы: «Өздеріңіз жақсы білесіздер, Мемлекет басшысы Қасым-Жомарт Кемелұлы бір сөзінде: «Халқымыздың дүниетанымына сай дәстүрлі исламды дәріптеу аса маңызды. Оның ғылыми-теориялық негізін дамыту қажет», – деген болатын. Асыл дінімізді ғылыми негіздеу мақсатында ҚМДБ жанынан Ислам ғылыми-зерттеу институтын аштық. Институт бүгінде рухани құндылықтарымызды насихаттауға ерекше көңіл бөліп келеді. Отандық және шетелдік кітапханалардың Сирек қолжазбалар мен ескі кітаптар бөлімінде шаң басып жатқан бабалар мұрасын жарыққа шығарып, ғылыми айналымға енгізу, сол арқылы дәстүрлі исламды ғылыми негіздеу – институттың басты мақсаттарының бірі. Бүгін осы бағыттағы еңбектің нәтижесін көріп отырмыз», – деді.
Институт директоры Төрәлі Қыдырдың айтуынша, асыл жәдігерлерді академиялық басылым ретінде жарыққа шығару мақсатымен институт тарапынан «Рухани мұра»жобасы қолға алынып отыр. «Рухани мұра» жобасы аясында Алаш кезіңнен Қараһандықтарға дейінгі бабалардан қалған мың жылдық жазба жәдігерлеріміз қайта жарыққа шығатын болады.
Бірінші кітап – 1912 жылы Қазандағы Императорлық университеттің типо-литографиясында жарыққа көрген «Мәрхәбән, йә, рамазан». Авторы – Кәрібоз Қаңтарұлы. Оның Жетісу жерінде дүниеге келгені, 1916 жылғы Қарқара жәрмеңкесіндегі Албан көтерілісі басшыларының бірі болғандығы, сондай-ақ, суреткер ғалым М.Әуезовтің «Қилы заман» шығармасындағы кейіпкерлердің бірі екендігі белгілі.
Екінші кітапқа 1898 жылы Қазанда жарық көрген Мәулекей Жұмашевтың «Мәрхәбән, йә, шаһры рамазан» атты туындысы еніп отыр. Мәулекейдің ХІХ ғасырдың соңы мен ХХ ғасырдың басында «Салсал қиссасы» («Қисса-и Салсал»), «Фарһад-Шырын», «Тамимдар қиссасы» («Қисса-и Тә мимдар») секілді шығармаларды жарыққа шығарғаны белгілі.
