Сұрақ: Ғайбат сөйлесе, ораза бұзыла ма?
Жауап: Ислам дінінің тәлім-тәрбиесінде адам әрдайым тілін жаман сөздерден, бос әңгімелерден тыя білуі қажет. Арамызда ораза ұстағанымен, күні бойы бос сөйлеп, керексіз істермен айланысатын кісілер де кездеседі. Адамның сыртынан ғайбаттау, өсек айту, жала жабу, балағаттау т.б. іс-әрекеттер – Ислам діні қайтарған амалдардан. Ораза тұтқан адам тек тағам мен сусыннан ғана емес, келеңсіз сөздерден және жағымсыз істерден де өзін тыюы керек. Сондықтан кім оразадан барынша рухани пайда тауып, толыққанды сауапқа қол жеткізгісі келсе, тағам және сусыннан ғана емес, бос сөзден, ұят іс-әрекеттерден сақтанғаны абзал.
Пайғамбарымыздың (с.а.у.) хадисінде: «Кімде-кім жалған сөйлеуден және оған амал етуден тыйылмаса, оның ішіп, жеуден тыйылуының Аллаға қажеті жоқ» десе, тағы басқа бір хадисінде: «Сіздердің біріңіз ораза ұстаса, ұятсыз сөздер айтпасын және ашуланбасын. Егер біреу онымен жанжалдасып ұрысқысы келсе «мен оразамын» десін» деген.
Ораза ұстау арқылы жаман қасиеттерден арылып, жақсылыққа себепші болайық.
Икрам АЙТАЕВ
