Сұрақ: Ашық садақа беру дінге қайшы емес пе?
Жауап: Садақа беру – Алланың ризашылығына бөленетін игі амалдың бірі. Адамдар шүкіршіліктен, түрлі бәледен сақтану мақсатында садақа береді. Қоғамда ашық садақа беріп жатқан түрлі жағдайларды байқауға болады. Аталған амалдарға дұрыс немесе бұрыс көзқарастарын білдіріп жатады. Садақаны ашық немесе құпия беру адамның шынайы ықыласы мен ниетіне байланысты.
Құпия садақа рияшылдықтан, мақтанудан қайтара отырып, мұқтаж адамдардың намысы мен ыңғайсыз жағдайға түсуінен сақтайды.
Ашық садақа беруде басқаларға үлгі болумен, айналадағы адамдарды жақсылық жасауаға ынталандыруға бағытталған амалдар болуы керек. Егер ашық садақа беру өзгелерді жақсылыққа шақыру мақсатында болса және риядан сақталса, дінде құптарлық іс. Ал беретін садақасы мақтану, бедел жинау ниетінде болса, ондай адамдар құпия бергені дұрыс. Себебі бұрыс істелген амалдарда сауап болмайды.
«Бақара» сүресінің 271-аятында: «Қайыр-садақаны жария түрде бергендерің қандай жақсы! Ал егер ешкімге көрсетпей, жоқ-жітіктерге жасырын түрде берсеңдер, әрине бұл өздерің үшін әлдеқайда жақсы болмақ. Алла сол арқылы біраз күнә-қателіктеріңді кешеді. Алла не істеп, не қойып жүргендеріңнен толық хабардар» деген.
Икрам АЙТАЕВ
