Астана және Қазақстан митрополиті Александр елорда мен Алматы қаласында Рождество мерекесіне орай өтетін діни рәсімдер қашан басталатынын айтты.
— Қазақстанда ежелден бүгінгі күнге дейін еліміздің жетекші екі конфессиясы — Ислам дінінің Ханафи мәзһабы мен Православиелік христиандықтың мерекелерін тойлау дәстүрі қалыптасқан. Иса Мәсихтің туған күнін тойлау кезінде біз бейбітшіліктің өркендеуін, дұшпандықтың, өшпенділік пен зұлымдықтың жойылуын тілеп, дұға етеміз. Рождестволық құлшылық ету рәсімі жайлы айтар болсақ, биыл Алматы тұрғындары үшін негізгі шара өтетін орын бұған дейінгі жылдардағыдай қаладағы 28 гвардияшы-панфиловшылар атындағы саябақта орналасқан Вознесенск кафедралы шіркеуі болып қала береді. Астанадағы Успенск кафедралды шіркеуі — Қазақстан Республикасындағы басты шіркеу. Онда діни жоралғыларды елордалық метрополиттік округ істерін басқарушы епископ — қаскелеңдік Геннадий өткізеді. Мерекелік шаралар қаңтардың 6-сынан 7-сіне қараған түні 23:00–де басталады, — деді ол Рождество мерекесіне орай өткен баспасөз мәслихатында.
Митрополит, сондай-ақ, Мәскеу және бүкіл Русь Патриархы Кирилдің Қазақстанға келетінін атап өтті.
— Өткен жылдың 22 қарашасында Мәскеуде Мәскеу және бүкіл Русь Патриархы Кирилл мен Қазақстан Республикасы Парламенті Сенатының төрағасы Мәулен Әшімбаевтың кездесуіне қатыстым. Сенат төрағасы ҚР Президенті Қасым-Жомарт Тоқаевтың атынан Әулие Патриархқа биыл 17-18 қыркүйекте Астана қаласында өтетін Әлемдік және дәстүрлі діндер көшбасшыларының VIII съезіне шақыртуды табыс етті. Әулие Патриарх келісім берді. Жақында ол кісімен сөйлесіп, алдағы сапардың жай-жапсарын талқыладық, — деді ол.
Еске салсақ, биыл Рождество — 2025 жылғы 7 қаңтар сейсенбіге келеді, демек қосымша демалыс күні болады.
