Сұрақ: Әйелім намаз оқығанымды қаламайды. Сол үшін ажырасып кету қаупі бар. Не істесек керек?
Жауап: Отбасының бірлігін сақтау – аса маңызды жауапты іс. Отбасы мүшелерінің бір-біріне көңіл бөлуі, қолдау көрсетуі және отбасы мүшесін қандай кемшілігімен болса да қабылдай білуі қайырлы. Намаз – Алланың бұйырған парыздарының бірі. Намазханның бойында адамгершілік қасиеттері болуы қажет. Исламның намаз, ораза, т.б. шарттарын орындауда өзгелерге салмақ салмағаны дұрыс. Жат діни ағымдардың белгілерінен сақ болғанымыз абзал. Ажырасуға негіз болатын мән-жайлар болмаса, орынсыз ажырасу мәселесін көтеру – ауыр күнәлардың бірі.
Дәстүрлі Ислам дінінде неке, отбасы ұғымы қасиетті. «Ниса» сүресінің 19-аятында: «…Жарларыңмен жақсы қарым-қатынаста болыңдар. Егер оларды ұнатпай қалсаңдар (сабырлылық танытыңдар), Алла сендер ұнатпаған нәрсенің артын қайырлы қылып, көптеген жақсылыққа ұластыруды қалайтын шығар» деген.
Пайғамбар (с.а.у.) хадисінде: «Неке – менің сүннетім! Кім менің сүннетімнен бет бұрса, менен бет бұрған болады» және «Үйленіңдер, көбейіңдер! Қияметте мен сендердің көптігіңізбен мақтанамын» деген, тағы бір хадисінде: «Алла тағалаға адал еткен істің ішіндегі ең жағымсызы – ажырасу» деп, ажырасу мәселесін орынсыз қозғауға болмайтынын ескерткен.
Икрам АЙТАЕВ
