Жуырда Ақтөбе облысының аумағында «Сыбаға» фестивалі бастау алып, соның аясында «Салбурын – 2024» облыстық ашық турнирі өтті.
«Сыбаға» фестивалінің мақсаты – өскелең ұрпақ бабалар салған сара жолдан ажырамас үшін дәстүріміз бен салтымызды ардақтап, озық үлгілерді дәріптеп, дағдыға, қоғамдық міндетке айналдыру. Дәстүр аясында бақуатты тұрмыс кешіп, бірлік пен берекеге қол жеткізуге болатынын ұғындыру. Ұлттық құндылықтарды, еңбекқорлықты дәріптеу және салауатты өмір салтын насихаттау болып табылады.
Осы орайда, Ақтөбе қаласының дін мәселелері және қоғаммен байланыс жөніндегі орталығы аталмыш турнир барысында облыстық дене шынықтыру және спорт басқармасымен, Ақтөбе облысының «QUMAI TAZY» федерациясы қоғамдық бірлестігімен бірлесе «Құмай тазы» жарысын өткізді.
Тазы жарысы кезінде тазы жанашырларының спорттық киімі мен жабдықтары, тазы тұлғасы, күйі, сипаты, ерекшелігі және жүйріктігі бағаланып, үздіктері ұйымдастырушылар тарапынан ақшалай және бағалы сыйлықтармен, дипломдармен марапатталды. Тазының жүйріктігі – қоянға қосылып және шырғаға салу арқылы бәстесу негізінде анықталды. «Сұлу тазы» номинациясы бойынша 3 құмай тазының иелері А.Жакбабаев, Р.Иса және С.Бақбергенов сыйлықтарға ие болды.
Сұлу тазылардың сәнімен, сал-серідей жігіттердің әрімен ерекшеленген сайыс қазақтың аңшылық, саятшылық өнерін тағы бір мәрте еске салғандай болды.
АЙГҮЛ КАНАФИЯ
Дін мәселелері және қоғаммен
байланыс жөніндегі орталығының
сектор меңгерушісі
