Бүгін Нұр-Мүбарак университетіне Астанадан ҚМДБ Төрағасы, Бас мүфти Наурызбай қажы Тағанұлы бастаған делегация арнайы келді. Жаңа оқу жылының басындағы Бас мүфтидің университет ұжымымен кездесудің басты мақсаты – Нұр-Мүбарак Египет ислам мәдениеті университеті Қамқоршылар кеңесінің 10 қыркүйекте өткен отырысында тағайындалған жаңа проректорды таныстыру.
Алғы сөз сөйлеген ҚР Мәдениет және ақпарат министрлігі Дін істері комитетінің төрағасы Ержан Нүкежанов осы уақытқа дейін қызмет еткен университет ректоры, профессор Мұхаммад аш-Шаххат пен проректор, PhD доктор Қайрат Құрманбаевқа алғыс білдіріп, жаңадан тағайындалған проректор, PhD доктор Ершат Оңғарға сәттілік тіледі. Сондай-ақ Нұр-Мүбарак университетіндегі мамандар даярлау сапасының жаңа белеске көтерілуіне сенім білдірді.
Бас мүфти Наурызбай қажы Тағанұлы жаңа тағайындаудың мән-жайына тоқталып, Қамқоршылар кеңесінің қолдауына ие болған PhD доктор Ершат Ағыбайұлының білімі мен білігі отандық дін мамандарын даярлауда лайықты деп сенім артты. Сонымен қатар, осы уақытқа дейін Нұр-Мүбарак университетін басқарған ректор, профессор Мұхаммад аш-Шаххат пен проректор, PhD доктор Қайрат Құрманбаевқа алғысын жаудырды. Университет ұжымына ел игілігі мен дін қызметі жолында әрдайым бірлікпен қызмет етіп, Отанымыздың дамуына ынтымақпен үлес қосудың маңызын атап өтті.
Ұжыммен таныстырылған жаңа проректор PhD доктор Ершат Ағыбайұлы жауапты аманатты тапсырған қос елдің өкілетті лауазым иелерінен құрылған Қамқоршылар кеңесінің сенімін ақтауда дін жолындағы 30 жылдық білімі мен білігін жас мамандарды даярлау қызметіне дайын екендігін атап өтті.
Алқалы жиында ҚМДБ-ның бұрынғы Төрағасы Серікбай қажы Ораз бен PhD доктор, профессор Мұхитдин Исаұлы жылы лебізін білдіріп, ел игілігі жолындағы әрбір азаматқа сәттілік тіледі.
Айта кетсек, Қазақстан мен Мысыр елінің құзырлы өкілдерінен құрылған Нұр-Мүбарак университетінің Қамқоршылар кеңесінің 9-кездесуінде жоғары білім ордасының басшылығын сайлаған болатын. Нәтижесінде, Мысыр тарапынан ректор лауазымына профессор Ахмад Хусейн тағайындалды.
