ҚМДБ ШҚО өкілдігі облыстық «Халифа Алтай» мешітінде «Мешіт имамдарының неке қию тәртібі» атты семинар ұйымдастырды.
Жиынға өкілдікке қарасты ауыл және аудан, қала имамдары қатысып, «Мешіт имамдарының неке қию тәртібі» құжатымен танысып, осы бағытта дәріс тыңдады. Сонымен қатар семинарда неке қию рәсімін бірізді болдырып, ҚМДБ-дан берілген ереже аясында атқару маңыздылығы түсіндірілді.
Семинарда ҚМДБ ШҚО бас имамы Ермек Қасболатұлы: «Отбасы құндылықтары – барша мұсылмандар қастерлейтін ұғым. Отбасының іргесі адал ақ некеден басталады. Ислам дінінде неке – ер мен әйелдің шариғат бойынша адал жолмен отбасын құру келісімі Мешіт имамдары неке қию рәсімі кезінде шариғат талабына сәйкес неке шарттарын, ерлі-зайыптылардың міндеттері мен жауапкершіліктерін даналық және сыпайылықпен жеткізіп, қызметін еңбек тәртібіне сай атқаруы тиіс. Имамдар неке қию рәсімін атқару барысында Діни басқармадан бекітілген ережемен талапқа сай орындауы керек» дей келе, неке қиюдағы некенің шарттары, некенің рүкіні, мәһір мәселесі, неке қиылмайтын жағдай, өзге дін өкілімен некелесу қатарлы негізгі жайттарды толық түсіндіріп өтті.
Бас имам неке қиюда имамдар өз жұмысына аса қырағылықпен қарап, еліміздің отбасы, неке жайлы заңнамаларын сақтау маңызды екендігін ескертті.
«Мешіт имамдарының неке қию тәртібі» құжаты кітапша болып басылып, өңірдегі барлық дін қызметкерлеріне таратылды. Сонымен қатар мешіттерде «Неке қию» журналы болуы керектігі ескертілді.
