Республика күніне орай Нұр-Мүбарак университетінде бүгін «Жаңа Қазақстан» қоғамында ислами білім берудің өзекті мәселелері талқыланды. Басқосудың алғысөзінде проректор, PhD доктор Қайрат Құрманбаев Республика күніне арнап осындай салиқалы шара ұйымдастырып отырған Ғылым және инновация департаментіне алғысын айта келе, барша қатысушыларды Республика күнімен құттықтады. Қоғам қанша өзгерсе де, ислами білім берудің бағыты мен бағдары тұрақты болатынына тоқталған проректор Қ.Құрманбаев дін саласындағы, әсіресе ислами білім берудегі әдіс-тәсілдер заманға сай жетілдіріліп отыру қажеттігін атап өтті.
Сондай-ақ модератор ҒИД департаментінің директоры PhD доктор Ықтияр Палтөре дөңгелек үстелде оқылатын баяндамалар мен қозғалатын мәселелерді түсіндіріп өтті. Әбу Ханифа ғылыми-зерттеу орталығының директоры профессор Шамшәдин «Цифрландыру дәуіріндегі Қазақстандағы ислами білім беру», PhD доктор Мұхан Исахан «Қазақстандағы діни білім берудің өзекті мәселелері», профессор Асылбек Избаиров «Ислами білім берудің заманауи талаптары: стереотиптері мен шаблондардан арылу» PhD доктор Түсіпхан Имамумади «Қазіргі фиқһ мәселелерін оқыту: теория мен практикаүйлесімі мәселесі», аға оқытушы Маржан Жолмағанбетова «Жасөспірімдердің өтпелі кеңінде дәстүрлі тәрбие берудің этнопедагогикалық және діни негіздері», PhD доктор Ықтияр Палтөре «Зайырлы қоғамдағы ұлттық тұтастықты дамытудағы діни білім беру маңызы» туралы баяндамаларын ұсынды. Тыңдаушы докторанттар мен магистранттар өз сауалдарын қойып, жауаптарын алды.
Республика күнінің құрметіне арналған келелі басқосуының соңында баяндамашы ғалымдарға арнайы сертификат табысталып, естелік суретке түсті.
