Адамдар арасында жанжалдың, зұлымдықтың артуы – ақырзаман жақындағанының белгісі. Қазіргі заманда бөтен кісілердің қолынан емес, туған ата-анасының, бауырларының қолынан зардап көріп жүргендер артып кеткен.
Пайғамбарларымыздың айтуынша, ақырзаманға жақындаған белгілердің бірі зұлымдықтың артуы және адамдарға зорлық-зомбылықтың көбеюі екендігін айтты. Сондықтан зұлымдықтың адамзат тағдырына өте ауыр екендігін ескеріп, ондай әрекеттерден алшақ жүрген абзал.
Ақырзаманның нақты қашан болатыны бір Аллаға ғана аян екендігі туралы қасиетті Құранда:
«Олар сенен қиямет-қайымның қашан орнайтынын сұрайды. Оларға: «Ол жайлы нақты мәлімет Раббымның жанында», – деп айт. Одан өзге ешкім де оның кесімді уақытын дөп басып ашып айта алмайды. Қиямет-қайым – күллі аспан әлемі мен жердегі күллі жаратылыс атаулыға өте ауыр тиетін алапат құбылыс. Ол сендерге аяқ астынан келеді. Сен қияметтің уақытын қатты білгің келіп, зерттеп жүргендей олар сенен қайта-қайта сұрай береді. Ендеше: «Ол жайлы нақты мәлімет Алланың құзіретінде. Алайда адамдардың дені бұл ақиқатты білмейді», – деп айт», – деп айтылған.
Қиямет қайым жақындағанда жер бетін тұман қаптайды екен. Бұл тұман қырық күн, қырық түн бойы аспан мен жердің арасын толығымен толтырады. Осы тұманның кесірінен пенделер тұмауратып, мұсылман еместер мас адам секілді сенделіп жүретін болады.
Бұл жөнінде Ибн Аббас былай деген: «Түтін өткен, алайда ол қияметтің белгілерінің бірі. Түтін қияметтің қарсаңында келеді, сол кезде одан мұсылманға тұмау сияқты нәрсе тиеді. Ал мұсылман еместер мен мұнапықтардың бастары пісіріледі, тіпті олардың бастары кептірілген мейіз сияқты кеуіп қалады. Өздері, бейне бір мас сияқты болып қалады. Іштеріне түтін толып, езулерінен, құлақтарынан бұрқырап шығады»,- деп жазылған.
Қияметтің белгілерінің бірі дін ілімі азаяды, сауатсыздық көбейеді, зина жасау етек алады, әйелдер көбейіп еркектер азаяды. Одан басқа белгілердің етек алуы ақырзаманның жақындағанын көрсетеді:
– Көп қабатты үйлердің салынуы, өз ісінің маманы емес кісілердің сөз сөйлеуі мен билік етуі көбейеді
– Нәпсіге бой алдыру мен ойына келгенін жасайды
– Аманатқа қиянат етеді
– Харам нәрселерді халал деп санайды
– Өсімнен түскен ақшаны ойланбастан жейді
– Жастардың үкімет басына келуі
– Ерлі – зайыптылардың ажырасуы көбейеді
– Зина жасау етек алады
– Сенімді, адал кісілерді опасыз адамдай көреді
– Зекет берілмейтін болады
– Ішімдік ішу көбейеді.
Ислам діні бойынша бұл күннің болатынына сену – иман тіректерінің бірі, мұсылман ақидасының ажырамас бөлігі. Сол себепті, шынайы мұсылман ақырзаманның болатынына сеніп қана қоймай, оның негізгі белгілерін де білуі керек.
Әбдіраш Балжан
