Елімізде биыл халық арасында А гепатиті ауруының айтарлықтай өскені байқалады. Нақтырақ айтқанда, Денсаулық сақтау министрлігі Ұлттық қоғамдық денсаулық сақтау орталығының жұқпалы аурулардың алдын алу бөлімінің бас маманы Әсемгүл Абатованың дерегіне қарағанда, биыл 7 айда 2022 жылдың сәйкес кезеңімен салыстырғанда халық арасында індет 7 есеге дерлік артқан. Өткен жылдың жеті айында 182 жағдай болса, биыл 1272 жағдай тіркелді.
Аурудың басым бөлігі Алматы (276 жағдай), Астана (115 жағдай), сондай-ақ Алматы (181 жағдай), Шығыс Қазақстан (101 жағдай), Абай (99 жағдай) және Жетісу (88 жағдай) облыстарында анықталды.
Көбінесе адамдар көп жиналатын жерлерде жүретін адамдар ауырады: барлық жағдайлардың 40% (482 жағдай) мектеп оқушылары, 14% (183 жағдай) студенттер және 8,4% жұмысшылар мен қызметкерлер.
Бұл аурудың белгілері қандай? Вирусты А гепатиті – бұл негізінен бауырды зақымдайтын вирустан туындаған адамның жіті жұқпалы ауруы. Оның алғашқы белгілері – дене қызуының көтерілуі, әлсіздік, тәбеттің төмендеуі, жүрек айнуы мен құсу, бұлшық еттің ауыруы. Кейіннен зәрдің түсі қараюы байқалады, ол күшті қайнатылған шайдың түсіне ұқсас болады, ал нәжіс, керісінше, түсі өзгереді, сарғаю пайда болады (склераның, терінің сарғаюы).
«А» вирусты гепатитін жұқтырудан қалай сақтануға болады? Жеке гигиенаның негізгі ережелерін сақтау арқылы ауруларды болдырмауға (алдын алуға) болады.
Ол үшін:
– тамақ ішер алдында, дәретханаға барғаннан кейін, серуендеуден кейін, сондай-ақ сіздің отбасыңызда гепатитпен ауыратын науқас болса, науқаспен әр сөйлескеннен кейін қолыңызды мұқият жуыңыз;
– жемістер мен көкөністерді жер алдында таза ағынды сумен мұқият жуыңыз;
– азық-түлік өнімдерін сатуға арналмаған жерлерден сатып алмау, оларды сатып алған жағдайда термиялық өңдеуден (қайнату, қуыру) кейін ғана пайдалану:
– термиялық өңдеуге ұшырамайтын экзотикалық өнімдерді қолданбаңыз (устрица, мидия және басқа ұлулар және т.б.).
«А» вирустық гепатитінің алдын алудың тиімді әдісі – осы инфекцияға қарсы вакцинация. Қазіргі уақытта А гепатитіне қарсы тиімділігі жоғары және қауіпсіз вакциналар әзірленіп, қолданылып жатыр.
Егер сізде гепатит белгілері пайда болса, өзін-өзі емдеуге болмайды және дереу дәрігерге хабарласыңыз. Дәрігердің барлық ұсыныстарын орындау маңызды.
Денсаулық сақтау министрлігінің
Қоғамдық денсаулық сақтау орталығының баспасөз қызметі
