Алматы облысы Жамбыл аудандық «Шынасыл» мешітінде жергілікті имамдардың білімін жетілдіруге арналған курс өз жұмысын бастады.
Өңіріміз бойынша діни оқу ағарту бағытына жауапты маман Сәкен Еншібайұлының ұйымдастыруымен өткен танымдық шараның шымылдығын Алматы облысының бас имамы Мадияр қажы Тағайбайұлы ашып, дін қызметкерлерінің зейіндерінің ашылып, білімдерінің артуына тілектестігін білдірді.
Осыдан кейін PhD доктор, Нұр-Мүбарак Египет ислам мәдениеті университетінің аға оқытушысы Асқар Болатбекұлы «Жаңа ғасырдағы жат ағымдар мен ұйымдар» және «Иманның шарттары» тақырыптары аясында дәріс оқыды.
Келесі болып сөз алған PhD доктор, Нұр-Мүбарак Египет ислам мәдениеті университетінің аға оқытушысы Мұхиддин Исаұлы «Ихсан және көркем мінез», «Сопылық жолдың қалыптасуы», «Яссауи және Нақышбандия тариқатының қалыптасу тарихы», «Мухкәм және мутәшәбиһ аяттар» және «Тәпсір түрлері: Меккелік және Мәдиналық сүрелер мен аяттар» тақырыптары бойынша дәріс оқып, ойларымен бөлісті.
