Қарағанды облысының бас имамы Естай Айтуғанұлы өңір әкімі Ермағанбет Бөлекпаевпен кездесті.
Кездесу барысында бас имам Қарағанды облысына жаңадан тағайындалған аймақ басшысы Ермағамбет Қабдулаұлының қызметіне сәттілік тілеп, ҚМДБ төрағасы, Бас мүфти Наурызбай қажы Тағанұлының сәлемі мен құттықтауын жеткізді.
Берекелі басқосуда Қарағанды өңірінің әкімі Ермағамбет Қабдулаұлы бас имамның да қызметіне сәттілік пен толағай табыс тіледі. Естай Айтуғанұлы осы жылы атқарылатын Діни басқарма бекіткен негізгі бағыттар мен алдағы жоспарлар жайында баяндап, өңір басшысымен ортақ мүдделер тұрғысынан бірлесе қызмет жасауға келісті.
Сондай-ақ жаңадан бой көтеріп жатқан облыстағы медреселер мен мешіттердің құрылыс барысы және имамдардың әлеуметтік мәселесі талқыға салынды. Қарағанды облысының діни ахуалынан хабар алған Ермағамбет Қабдулаұлы бас имам Естай Айтуғанұлына ел келешегі мен өңірдегі діни тұрақтылық жолында бірге қызмет атқаруға дайын екенін жеткізіп, тараптар дін мен дәстүр сабақтастығы төңірегінде бірқатар бірлескен игі жобаларды жүзеге асыруға уағдаласты.
