Бүгін Астанада Қазақстан мұсылмандары діни басқармасының «MUNARA FM» интернет радиосы ашылды. Салтанатты ашылу шарасына ҚМДБ Төрағасы, Бас мүфти Наурызбай қажы Тағанұлы, «Қазақ радиолары» ЖШС бас редакторы, Қазақ радиосының директоры Дулат Абуибуллаев, сондай-ақ ҚМДБ Орталық аппаратының қызметкерлері қатысты.
«Діни басқарманың «MUNARA TV» арнасы бар, енді интернет радиосы да іске қосылды. Радио тыңдармандар назарына күн сайын бағдарламалар мен аудиокітаптар ұсынады. Одан бөлек балаларға арналған хабарлар мен имам-ұстаздардың уағыз-дәрістерін де радио арқылы тыңдауға болады» деп атап өтті Наурызбай қажы Тағанұлы.
Айта кетейік, «MUNARA FM» радиосынан тыңдармандар ҚМДБ мен «Қазақ радиосының» бірлескен жобасы – «Ықылас» радиохабарын, «Ғибратты әңгімелер» сағатын, «Ихсан – рухани тәрбие негізі» кітабының аудио нұсқасын, Наурызбай қажы Тағанұлының «Үміт сәулесі», Алау Әділбаевтың «Саңлақ сахабалар», Қалмахан Сейітұлының «Пайғамбарлар тарихы» аудиокітаптарын тыңдай алады. Сондай-ақ радио эфирінен қасиетті Құран Кәрімнің қазақша түсіндірмесін, балаларға арналған «Мұсылман әліппесі» хабарын, мүфтият ұстаздарының Республикалық бас мешіттегі дәрістері мен елімізге танымал имамдардың әсерлі уағыздарын т.б аудиожобаларды тыңдауға болады.
