Ақтөбе қаласының Дін мәселелері және қоғаммен байланыс жөніндегі орталығы жастар арасында «Жастар діни экстремизм мен терроризмге қарсы» атты және Ақтөбе қаласындағы мешіттердің ұстаздары, дін саласының мамандары, дін мәселелері жөніндегі ақпараттық-түсіндіру топтарының мүшелері арасында «Ұлттық құндылықтар және дін – тәрбиенің діңгегі» атты қос бірдей эссе байқауын өткізген болатын.
Жастар арасындағы байқауға 23, ұстаздар арасындағы байқауға 12 өтініш түсті. Байқау қорытындысы мен әділқазылар алқасының шешіміне сәйкес жеңімпаздар бағалы сыйлықтармен, дипломдармен марапатталды.
Жастар арасында радикалды идеологияның таралуын болдырмау, терроризм мен экстремизмнің алдын алу, ұлттық дәстүрлер мен мәдениетке құрметпен қарауға тәрбиелеу мақсатын көздеген жастар арасындағы байқауда Баишев университетінің 4 курс студенті Жақсылықова Эльмира оқ бойы озық түсіп, жүлделі 1 орынды иеленді. 2, 3 орындар Д. Қонаев атындағы ЖББОМ 9 сынып оқушысы Асылбекқызы Нұрайым мен Баишев Жоғары медициналық колледжінің студенті Таңқыбай Айасылға бұйырды.
«Ұлттық құндылықтар және дін – тәрбиенің діңгегі» атты ұстаздар арасындағы байқау мақсаты – дана халқымыздан асыл мұра болып келе жатқан ұлттық құндылықтарды дәріптеу, халық арасында кеңінен насихаттау, жамағатпен жұмыс жасайтын мешіт үстаздарының, дін саласы мамандарының, дін мәселелері жөніндегі ақпараттық-түсіндіру тобы мүшелерінің шығармашылық әлеуетін дамыту.
Оған қала мешіттерінің қызметкерлері, дін мәселелері жөніндегі ақпараттық-түсіндіру топтарының мүшелері белсене қатысты. Әділқазылар алқасы үздік жұмыстарды саралай келе, жүлделі 1 орынға «Ихсан орталығы» ҚБ психологы Эльмира Адильханованың «Ұлылар ұлағаты – рухани тәрбие бастауы» атты эссе жұмысын лайық деп бағалады.
Жүлделі 2 орынды Ақтөбе облыстық орталық «Нұр Ғасыр» мешітінің ұстазы, баспасөз хатшысы, журналист Ақтолқын Тажикова иеленіп, 3 орынды Ақтөбе қалалық орталық мешітінің наиб имамы Марал Иманғали қанжығасына байлады.
Сонымен қатар барлық қатысушылар алғыс хаттармен марапатталды.
Салтанатты шара барысында сөз алған әділқазылар, олар: Еркін Тобылбаев, қазылар алқасының төрағасы, Д.Қонаев атындағы ЖББОМ тарих пәнінің мұғалімі, «Қазақстанның әкелері» Республикалық әкелер қауымдастығының құрылтайшысы, Дін мәселелері жөніндегі қалалық ақпараттық-түсіндіру тобының мүшесі; Жанаргүл Болатова, қазылар алқасының хатшысы, №51 мектеп-гимназиясының қазақ тілі мен әдебиеті пәнінің мұғалімі; Нұрсұлтан Қожабеков, Ақтөбе қаласының жастар ресурстық орталығының басшысы таразы талқысына келіп түскен әрбір жұмысқа тоқталып, кейбір кемшін тұстарды да атап көрсетті.
Іс-шара соңында эссе байқауының жеңімпаздары ұйымдастырушыларға алғыстарын білдіріп, алдағы уақытта жұртшылық алдында сөйлеп, ақпараттық-түсіндіру жұмыстарын жүргізетін мамандардың шығармашылығын шыңдайтын байқаулар көбірек өткізілсе деген тілектерін жеткізді.
Айгүл КАНАФИЯ
Ақтөбе қаласының Дін мәселелері
және қоғаммен байланыс жөніндегі
орталығының сектор меңгерушісі
