Маңғыстау облысы Дін істері басқарамасының мемлекеттік әлеуметтік тапсырысы аясында 15 сәуір күні Ақтау қаласындағы аз қамтылған, көпбалалы және осал объектінің балаларының қатысуымен «Балаларым – бақытым» атты іс-шара ұйымдастырылды.
Оған «Отпан» ақпараттық-түсіндіру және оңалту орталығы» ҚҚ-ның теолог маманы Казиева Ақмарал және психолог маман Мұхамбетова Динара қатысты.
Бұл іс-шараның мақсаты – аз қамтылған отбасы мүшелері балаларының бүгінгі замануи ойын түрлері арқылы қоғаммен өзара байланысын орнату, көпшілікпен сыйластық арқылы араласуы, бауырмалдыққа, татулыққа тәрбиелеу.
Қазақ халқында «Баланы ойын өсіреді» деген даналық сөз бар. Қазақтың ұлы ойшылы Абай Құнанбаев: «Ойын ойнап, ән салмай, өсер бала бола ма?» деп айтқандай баланың өмірінде ойын ерекше орын алатындығы белгілі.
Бала ойнап жүріп ойланады, жүйкесі тынығады, көңілі өсіп, ойы сергиді, денесі шымырланады. Ойын арқылы тұрмыс-салт, әдет-ғұрып, ұлттық ерекшелік, дәстүр жайлы танымы, түйсігі қалыптасады.
Ойын – баланың жан серігі. Қай бала болмасын ойнап өседі. Ойын сырттай қарағанда қиындығы жоқ, оп-оңай көрінуі мүмкін. Ал іс жүзінде бала үшін ойын арқылы басқалармен тіл табысып, өзінің ойлаған ойын іске асырады.
Іс-шара соңында ата-аналар мен балаларға дастархан жайылып, психологиялық тренингтер ұйымдастырылып, ұлттық құндылықтар насихатталды. Ата-аналар ризашылықтарын білдірді. Соның бірі Назгүл есімді ата-ана: «Бүгінгі күн өте керемет өтті, көп рахмет, жұмыстарыңызға табыс тілейміз», – деген лебізін жеткізді.
