Алматыда Қазақстан Республикасы Тәуелсіздігінің 30 жылдығына арналған көрме өтті.
8 қазаннан 8 қарашаға дейін Әбілхан Қастеев атындағы Орталық көрме залында «Ұлы таулардың шыңдары» республикалық көрмесі өтті. Онда елдің барлық аймағынан 45 суретшінің жұмысы көрсетілді. Көрмені «Social Development Center» ҚФ ҚР Мәдениет және спорт министрлігінің мемлекеттік әлеуметтік тапсырысы аясында ұйымдастырды.
Бір ай бойы ашық болған тегін экспозиция алматылықтар мен оңтүстік астананың қонақтарына отандық суретшілердің 60-тан астам бірегей кескіндеме туындыларын көруге мүмкіндік берді. Картиналардың басты тақырыбы – Қазақстанның табиғи және мәдени мұрасы, оның тарихы мен қазіргі жағдайы.
«Қазіргі Қазақстанның өнері сан алуан. «Ұлы таулардың шыңдары» көрмесі біздің өнеріміздің барлық қырын қамтымайды. Оның міндетіне уақыт сипатын қандай да бір дәрежеде көрсететін кіші кескіндеме айнасын жасау жатады. Осылайша мемлекет мәдениетіне нақты үлес қосады. Суретшілер Тәуелсіздіктің идеясын өздерінің туындыларында көрсетіп, халықтың көпғасырлық тарихынан, дәстүрлі мәдениет пен бүгінгі күн әлемінен сюжеттерді табады», – деп, мәдениеттанушы Күлжазира Мұқажанова көрменің ресми каталогында атап өтті.
Хан Тәңірі, Шарын, Көлсай, Бурабай және Баянауылдың таңғажайып сұлулығы Омархан Құмар, Сағындықова Мөлдір және Дүйсебеков Сайлаубек пен Дүйсебекова Ләйлә шығармашылық дуэті сияқты суретшілерге шабыт көзі болды. Көптеген қатысушылар өз жұмыстарында қала көрінісін көрсетті. Мәселен, Әбжанова Анар және Натбаев Жамбыл Алматы қаласындағы әл-Фараби даңғылының көрінісін және Гоголь көшесін, Маталар үйін салды.
Кейбір суретшілер тарихи тұлғалардың бейнесіне жүгінді. Сәкен Сейфуллин және Мұқағали Мақатаев сияқты көрнекті жазушылардың портреттерін Кайрамбаев Жумақын, Кабылбек Аршын және Сырғабаев Санжар көрсетті.
«Ұлы таулардың шыңдары» көрмесі қазіргі қазақстандық суретшілердің шығармашылығы арқылы тәуелсіздік жылдарындағы отандық өнердің жетістіктерін көрсете алды және жаңа есімдерді ашты.
Көрме залында экспозициядан бөлек 3Д форматындағы виртуалды көрме жасалды. Көрмені келесі сілтеме арқылы көруге болады: https://clck.ru/Y4bXW (жақсы сапада тамашалу үшін компьютерді қолдану ұсынылады).
